Nagdangop sa Bombo Radyo ro pamilya Arguellon maghalin sa Brgy. Quinabonglan, Maayon, Capiz agud nga ipanawagan ro andang igmanghod nga uwa nakadiretso it uli sa anda nga nag-agi sa Brgy. Caticlan, Malay ro ginsakyan nga bus maghalin sa Metro Manila.
Suno kay Jona Arguellon, imaw ro naghatod sa anang igmanghod nga si Glen Arguellon, 28 anyos sa bus terminal sa Calapan kon siin namonitor pa nana raya hasta sa pagsakay sa ro-ro vessel ag pagpanaog sa pantalan it Brgy. Caticlan.
Ginpahayag dugang nga may nagapaeag sa anang manghod rason nga uwa eon raya naila magsakay it uman sa bus pauli sa anda sa probinsya it Capiz hasta nga ko ulihi hay nawad-an eon imaw it kontak.
Kapin sa sang dominggo eon raya nga naduea rason nga gilayon imaw nga nag-uli maghalin sa Metro Manila para buligan ro anang pamilya sa pag-usoy sa anang manghod.
May nakasugid sigon kanda sa Caticlan nga nakit-an raya sa nasambit nga lugar apang uwa eon nasayuran makaron kon siin eon raya nagpadueong.
