KALIBO, Aklan—Dead on arrival sa Aklan Provincial Hospital ro sangka eaeaki matapos nga mabungguan it sangka saeakyan nga ginapanag-iyahan it LGU-Malay ag gina-alegar nga ginamaneho it sangka pulis sa atubang mismo it Tangalan Municipal Cemetery pasado alas 6:32 kabi-i sa Brgy. Tagas sa nasambitang banwa.
Ginkilaea ro biktima kay Alenor Sultan, 27-anyos, residente it Brgy. afga sa nasambitang banwa samtang ro driver mat-a it behikulo hay nakilaea kay Anthony Dalmacio, 31-anyos, residente it Brgy. New Buswang, Kalibo.
Base sa inisyal nga imbestigasyon it pulisya, nagatindog sigon sa waea nga porsyon it karsada ro biktima ag nagapatabok eon kunta kat gulping nag-agi ro nasambitang behikulo ag dikara hay aksidente imaw nga nabungguan.
Angot kara, sa pagguwa sigon ni Dalmacio it saeakyan para kunta buligan ro biktima gina-alegar nga ginkuyog imaw it pilang mga residente nga nakakita sa lugar.
Rason nga nag-angkon imaw it nagkaeain-eain nga lastro sa anang eawas.
Samtang, insigida man nga binawian it hueam nga kabuhi si Sultan matapos nga makaangkon it fatal nga lastro sa anang eawas tuga it pagkabunggo kana.
Sa makarun hay nagapadayun pa ro imbestigasyon it pulisya kasunod it insidente.
