KALIBO, Aklan–Patay ro sangka eaeaki matapos sigon nga hampakon it haeos 12 beses it tagad ukon bara it anang manghod sa sueod it andang baeay sa barangay Dumaguit sa banwa it New Washington.
Aminado ro suspek nga si John Paul Dela Cruz, 22 anyos nga bangud sa sobrang kaakig hay nahimo nana nga patyon ro anang kaugalingon nga magueang nga nakilaeang si John Rey Romualdo, 27 anyos, parehong owa it asawa ag residente it nasambit nga lugar.
Suno sa imbestigasyon, unang nag-uli sa andang baeay ro biktima nga hilong ag nakaangkon it diskusyon sa andang ama nga si Eserconcestion dela cruz, 54 anyos.
Naabutan ag nakita sigon it suspek nga una man sa impluwensiya it aeak nga ginbunaean it tubo it anang magueang ro andang ama ag natumba rason nga sa sobrang kaakig hay nagpangdueom ro anang panan-awan ag ginbo-oe ro bara nga nakasandig sa pader ag makapilang beses nga ginbunae sa biktima nga tinamaan sa ueo, leog ag iba pang parte it eawas nga naging rason it anang hinali nga kamatayon.
Nakasanayan sigon it anang magueang nga kon mahilong hay nagapa-ingit ag ginasinakit ro ro andang ama.
Samtang, una eon sa mayad nga kundisyon ro andang ama matapos nga daehon sa aklan provincial hospital tuga it nina sa ueo.
Boluntaryo man nga nagsurender ro suspek sa mga otoridad.
