KALIBO, Aklan—Nagapadayon pa ro imbestigasyon it Makato Municipal Police Station angot sa insidente it pagpangbuno nga nag-eontad sa Sitio Dingli, Brgy. Tina sa banwa it Makato kon sa siin binawian gid it hueam nga kinabuhi ro biktimang sangka construction worker.
Nasapwan eon lang nga nagahamyangon ag uwa it kabuhi ro biktimang si Vincent Capnao, 24-anyos, ag residente it nasambit nga lugar matapos nga nakaangkon it fatal nga lastro sa nagkaeain-eain nga parte it anang eawas tuga it pagbuno.
Suno sa anang maeapit nga himata ag kaeapit-baeay nga si Randy Torres, nagaisaeahanon eamang sa anang baeay ro biktima kon sa siin nakit-an imaw nga una sa impluwensya it aeak ko adlaw antes natabo ro krimen.
Uwa sigon sanda it nataeopangdan nga sangag maghalin sa panimaeay it biktima ag posibleng hanagob eon kon sa siin tueog ro tanan kat ginhimo ro krimen.
Ginatugyan eon lang nanda sa kapulisan ro maid-id nga imbestigasyon agud nga matumod ro responsable sa kamatayon it biktima.
Nagaeaum sanda nga ro naaywanan nga tsinelas hay makaturo sa pagkakilaea it suspek agud nga mataw-an it hustisya ro hinali nga kamatayon it eaeaki.
