KALIBO, Aklan—Nagapabilin nga sa kritikal nga kundisyon ro sangka 37-anyos nga eaeaki matapos nga barilon it anang naka-away bandang alas-10 kabi-i sa sangka waiting shed sa Brgy. Sugnod, Malinao.
Ro biktima hay nakilaea kay Judy Fernando ag residente it nasambit nga lugar.
Imaw hay nag-angkon it igo it bala sa anang dughan ag tuo nga abaga gamit ro M-11 caliber 9mm nga baril.
Samtang, ro suspek hay si Romy Agustino, 41 anyos, alyas Nonoy, sangka negosyante ag residente it Brgy. Capataga, Malinao.
Base sa inisyal nga imbestigasyon it Malinao municipal police station, samtang naga-agi ro suspek sa nasambit nga lugar hay nakita kara ro biktima ag nagpangutana kon siin ro anang bayaw nga si certain “Pokloy”.
Sa pagsabat nga “owa imaw iya”, gulpi sigon nga sinipa ni Agustino si Fernando nga tinamaan sa anang uyahon ag dayun nga ginbaril nga owa it karason-rason.
Ro insidente hay nasaksihan ni dating barangay captain Avelino Rimano nga imaw ro nagaserbing testigo sa krimen.
Nagpanindugan man imaw nga owa it natabu nga komosyon ag owa man it record nga may away ro daywa.
Ginatumod pa kon sa impluwensiya it aeak si Agustino kat natabu ro insidente.
Ro suspek hay presenteng sa kustodiya it Malinao PNP, apang nagapabilin nga kipo ro anang bibig sa natabu.
