Ginaeauman it sangka ekonomista sa Aklan nga may ihathat nga economic road map si Pangueong Ferdinand Marcos Jr. sa nakataeana nana nga kauna unahang State of the Nation Address ukon SONA sa adlaw it Lunes Hulyo 25, 2022.
Ginpahayag ni Mr. Ramon Quimpo Jr. nga masyado eon nga apektado it economic crisis ro nasyon bangud sa mataas nga inflation rate nga masobra sa 6 percent, manaba nga baeayluhan it piso kontra sa dolyar, nagapadayon nga gyera sa tunga it Russia ag Ukraine, ag ro sigidas nga paghueag sa presyo it produktong petrolyo sa pangkalibutanong merkado.
Sa pihak kara, dapat sigon nga taw-an it tyansa si Marcos Jr. nga maipakita ro anang kapas partikular sa pagdumaea sa sektor it agrikultura bangud nga sa makaron nga tyempo hay talamak ro importation it bugas, asukar, harina, sibuyas, bawang ag maskin ro isda.
Bangud kara, kinahang-ean nga makaangkon balanse ro tanan agud nga mabuligan ro mga mangunguma ag mangingisda.
Mag-eowas kara, ginaeauman dugang it ekonomista nga mataw-an it igtaeopangod ro corruption sa nasyon bangud nga raya ro yabe sa amat-amat nga pagbangon it ekonomiya ag ro pag-umwad it pangabuhian it kadagayaan
