KALIBO, Aklan—Kapin sa P800,000 pesos nga balor it illegal nga droga ro nakumpiska sa sangka eaeaki sa madinaeag-on nga drug buy-bust operation nga ginkasa it Altavas Municipal Police Station sa Brgy. Cabangila sa banwa it Altvaas, agahon it adlaw it Lunes.
Ginkilaea ro drug suspek nga si Japhet Tornalejo, 27-anyos, sangka electrician ag residente it Jaro, Iloilo.
Nabuoe sa anang posisyon ag kontrol ro sangka mabahoe nga sachet it suspected shabu kabaylo it marked money nga P22,500 pesos.
Sa pagpangusisa dugang it mga awtoridad, narekober kana ro kapin pa sa 11 ka sachet it illegal nga droga.
Angot kara, matapos ro operasyon hay gindaea si Tornalejo sa Altavas District Hospital ag ginpaidaeom sa medical examination antes nga gindaea sa taeatapan it pulisya.
Imaw hay una eon sa kustudiya it mga awtoridad ag magapangatubang sa kasong pag-eabag sa Republic Act 9165 ukon Comprehensive Dangerous Drugs Act of 2002.
Samtang, ro padayon nga Anti-Criminality and Anti-Illegal Drug Operations it Altavas Municipal Police Station hay agud nga masiguro ro kaeowasan ag seguridad it komunidad.
