KALIBO, Aklan—Ginpakigbahin it sangka embalsamador ro anang eksperyensya sa trabaho kasunod it nagahilapit nga All Saints and All Souls Day sa Nobyembre 1 hasta it 2.
Suno sa embalmer nga si Joey Bautista it sangka funeral homes iya sa banwa it Kalibo, inde malikawan nga makabatyag it kakaiba sa oras nga makaangkon sanda it kliyente apang bangud sa kabuhayon eon sa trabaho hay nasanay eon imaw ag ginabaliwala eon lang ro mga nababatyagan nga kakaiba sa anang palibot.
Nag-umpisa imaw sa edad nga 18-anyos ag hasta sa makaron hay naga-embalsamo gihapon imaw it patay matapos ro pilang dakada eon ro nakataliwan.
Ko una suno kana hay nakabatyag imaw it nerbyos kapin eon kon makit-an ro patay sa nagkaeain-eain nga rason it andang kamatayon apang ko ulihi hay nakaangdan eon man nana raya ag sa kaulihanan hay naduea eon man ro anang koeba.
Ginpahayag dugang ni Bautista nga sa edad nana makaron nga 62 anyos hay eksperyensyado eon gid imaw sa pag-embalsamo it patay ag ginataw-an it manami nga haya ro andang kliyente.
