KALIBO, Aklan—Ginkumpirma ni Ibajay mayor Joen Miraflores nga may sambilog sandang empleyado nga nagpositibo sa COVID-19.
Suno kana nga ro nasambit nga empleyada hay residente it banwa it kalibo nga naka-assign sa nasambit nga munisipyo.
Sa mayad nga swerte suno kana ag puro negatibo sa nasambit nga makamaeatay nga sakit ro mga nakasalamuha kara base sa resulta it andang swab tests.
Maskin sigon ro empleyada hay indi masayuran kon siin nana nabo-oe ro virus bangud nga haeos trabaho ag baeay eamang ro anang adlaw adlaw nga routine.
Ginpamalibaran man it alkalde ag gintawag nga “fake news” ro napabalitang may iba pang empleyado nga nagmasakit.
Bangud nga ro pasyente hay taga-kalibo, nagapabilin suno kana nga owa it nailistang aktibong kaso it covid 19 ro banwa it Ibajay.
Kadungan kara, nagpanawagan imaw sa mga ibajaynon nga indi magpanic ag maging kalmado ag padayun sundon ro ginapatuman nga minimum health protocols agud nga makalikaw sa sakit.
