KALIBO, Aklan — Arestado ro sangka empleyado matapos nga paguwaon nga ro kwartang ginbayad it andang customer sa ginbakae nga e-bike hay gina-alegar nga gin-holdap, hapon it Sabado, Agosto 17 sa Perazville Subdivision, Brgy. Old Buswang, Kalibo.
Ginasugid nga nauna eon nga nagdangop sa Kalibo Municipal Police Station ro suspek nga si alyas Willy, empleyado it sangka motorcycle distributor sa banwa it Kalibo.
Nauna kara, bandang alas-2:00 it hapon ko Agosto 17, nag-deliver sigon ro suspek it e-bike nga ginbayaran it cash it customer nga nagabalor it P51,000 sa nasambit nga lugar.
Apang, samtang nga nagatikang pabalik sa opisina hay gin-eambangan imaw it motorcycle riding suspek nga owa nana naitsurahan bangud nga mag-eowas nga nakasuksok it itom nga jacket hay naka-full face helmet.
Matapos sigon nga mabo-oe ro kwarta halin sa anang sling bag hay nagpaeagiw ro mga raya paagto sa direksyon it New Buswang, Kalibo.
Insigida man nga nagpangayo it bulig ro empleyado sa kapulisan nga imaw hay naholdap nga dayun nga ginrespondehan ag nagpatigayon it imbestigasyon.
Ko ulihi matapos nga ginpamalibaran it mga residente nga may natabu nga hold-up incident ag owa man it nakita sa CCTV footages sa lugar hay napilitan ro suspek nga aku-on nga obra-obra eamang nana ro scenario.
Ro nasambit sigon nga kantidad hay anang ginbayad sa anang utang sa online loan app nga halin sa P30,000 hay sumaka eon sa P74,000 bangud sa sobra kataas nga interest rate.
Dugang pa nga nagakabaeaka eon imaw bangud nga ginapaeag ag gina-pressure imaw nga bayaran eon ro anang utang.
Ginpa-cash-in sigon nana ro P51,000 nga koleksyon sa sangka convenience store ag ginbayad tanan sa anang utang.
Ginapahaum eon ro kasong Grave Abuse of Confidence kontra sa suspek.
