KALIBO,Aklan–Ginduea it pamunuan it Makato Municipal Police Station ro kahadlok ag kabaeaka it mga pumueoyo kasunod sa entrapment operation it intelligence section it Aklan Police Provincial Office ukon APPO sa 34 anyos nga eaeaki nga ekstorsyunista.
Suno kay PCapt. Abdon De Mateo, hepe it Makato PNP Station nga isolated case eamang ro natabo ag nagapabilin nga matawhay ro bilog nga banwa.
Sa makaron hay nagapabilin nga naka-hospital arrest ro suspek nga si Prince Igudas, 34-anyos it Lahog, Tapaz, Capiz matapos nga nagsukoe sa mga katapo it kapulisan hasta nga nabarilan sa hita it mga operatiba.
Nagapadayon pa ro imbestigasyon it pulisya kon minatuod gidman nga miyembro raya it New Peoples Army ukon NPA sandig man sa anang pagpakilaea agud nga kikilan ro negosyante nga tag-iya it construction firm halin sa demand nga P15 milyon pesos hasta nga nanaog sa P5 milyon pesos ag ko ulihi hay naging P1.5 milyon pesos eon lang.
Samtang sa pihak nga parte, ginpamalibaran it babaye nga kaibahan it suspek nga si Maria Rita Malandac, 28-anyos nga may kasayuran imaw sa transaksyon it suspek.
Suno kana, ginsampit manlang imaw nga maglagaw sa banwa it Kalibo hasta nga nakaabot sanda sa banwa it Makato.
Uwa suno kana imaw it ideya sa panaw it suspek kundi ro hambae eamang kana hay mawarang eamang sanda ag mauli man dayon.
Aminado si Malandac nga naging aktibong aktibista kat nagaedad pa eamang imaw it 16 anyos apang uwa eon napadayon bangud sa kaakig it anang ama.
