KALIBO, Aklan—Uman nga nagapanawagan ro sangka environmental advocate sa isla it Boracay sa lokal nga gobyerno it Malay nga balikan ro ginpatigayon nga pagtuon it mga eksperto angot sa problema sa beach erosion ukon paghugos it eugta sa bibi it baybay.
Suno kay Elena Tusco-Brugger, advisory council chairperson it Philippine Chamber of Commerce and Industry ukon PCCI-Boracay ag sangka kilaea man nga community leader nga eubus sanda nga nagakabaeaka sa amat-amat nga pag-us-us it eugta parikular sa beach area.
Suno kana nga kinahangean nga maghimo kara it insigidang aksyon ro gobyerno.
Ginpahayag dugang nga bukon eamang raya it daea it natural phenomenon kundi nga may kontribusyon man ro pagpabaya it mga tawo.
Una sigon raya nga nataeupangdan ko 2008 hasta 2009 partikular sa pagtama it bagyong Frank kun sa siin hasta sa makaron hay owa nakabawi ro Sitio Diniwid.
Ginapatihan nga bangud sa carrying capacity sa pag-inabu it mga buildings ag kapas-eawan it pilang resort owners nga makasunod sa patakaran nga 24+5 meter easement halin sa beach front ro pila sa mga ginaturo nga rason it problema.
Angot kara, apela ni Brugger sa LGU-Malay nga mas pang hugtan ro pagpatuman it nagakaigo nga laye agud nga mataw-an it proteksyon ro isla halin sa epekto it beach erosion.
Madumduman nga base sa pagtuon it Coastal Ecosystem Conservation and Adaptive Management ukon CECAM nga ginaeakipan it mga siyentipiko halin sa Tokyo Institute of Technology ag University of the Philippines nga nagapameligro ro ginapabugae nga puti ag pino nga baeas sa Boracay kon eubusan nga masamad ro mga corals sa palibot kara.
Sambilog sigon sa mga nakakasamad it coral reef hay ro anchor damage it mga iresponsableng boatmen ag ro waea tuo nga pagpatindog it mga buildings eabi eon sa mga ginakabig nga environmentally critical area.
Dugang pa ni Brugger nga kinahangean ro pagbueuligan it tanan agud nga masabat ro nasambit nga problema.
