KALIBO, Aklan—Temporaryong ginpasarado it mga otoridad ro sangka establisyemento nga nagabaligya it mga sapatos sa Brgy. Estancia Kalibo matapos nga dumugon it ginatos ka mga tawo bangud sa alok nga sale.
Suno kay P/Maj Bellshazzar Villanoche, hepe it Kalibo PNP,nga andang ginsita ro ODM kicks bangud owa raya nagasunod sa ginapatuman nga mga health protocol nga ginpatuman it IATF kontra sa COVID-19.
Sa pag-usisa sa lugar, natukiban man nga owa raya it business permit to operate.
Antes man nga magbukas ro sangka negosyo hay kinahangean nga magpasa anay it mga papeles ag magbo-oe it business permit.
Apang, ginbayolar raya it nagapag-iya ag ginpili nga magbukas samtang una pa sa katung-anan it pag-proseso it ibang mga papeles.
Samtang ginpahayag man ni Barangay Kagawad Ritchel Militar it Barangay Estancia, Kalibo nga nakadepende eun sa tag-iya it nasambitan nga establisiyemento kung masarangan karang ayuson ro andang mga papeles kaibahan ro polisiya nga dapat ipatuman agud makilawan ro pagtaeapnan it virus sa sueod it andang establisyemento.
Raya hay matapos man sigon magtumpok-tumpok ro mga tawo maghalin sa nagkaeain eain nga banwa bangud sa alok kara nga sale ukon mas barato nga presyo it ginabaligyang mga sapatos.
