KALIBO, Aklan–Suportado it pilang manugturo ro proposisyon ni Senator Robinhood Padilla angot sa paggamit it wikang Pilipino sa mga legal nga dokumento it gobyerno.
Suno kay Dr. Sharon Masula, Filipino Professor ag Head it Teacher Education Department it ASU-Ibajay nga mas madali maintindihan it mga pumueoyo kung wikang Pilipino ro nakasueat sa mga peryodiko.
Mas mapukaw suno kana ro interes it mga pumueoyo nga magbasa ukon magtan-aw bangud madali nanda raya nga maeubtan.
Nagapati si Dr. Masula nga bukon it maeain ro katuyuan it proposisyon ni Senator Padilla bangud makabig raya nga sangka manami nga tikang ag pagpakita it pagpalangga sa wikang Pilipino.
Apang, kinahang-ean sigon it mabusisi nga pagpahaum sa pagsaylo it kada tinaga.
Pila pa sa kinahang-ean ikonsidera ro paghire it lingwesta ag professor nga eksperto sa wikang Pilipino.
Kamana man ro pinansyal ag mahaba nga tyempo it mga tawong maga-ubra kara.
