KALIBO, Aklan—Nagapangatubang sa kasong pag-eabag sa Comprehensive Dangerous Drugs Act of 2002 ro sangka fish vendor bangud sa gina-alegar nga pagduso it illegal nga droga.
Suno sa suspek nga si Saul Señeres, 35 anyos, tumandok it Iloilo ag presenteng naga-istar sa Brgy. Poblacion Tangalan nga samtang nagalibod it baligya nga isda sakay it tricyle hay ginparahan imaw it pilang kaeaeakin-an nga ko ulihi hay natukiban nga mga operatiba it Provincial Drug Enforcement Unit ukon PDEU.
Ginpapundo ag gin-aresto imaw bandang alas-9:20 it agahon sa kilid it national highway nga sakop it Brgy. Tabangka, Numancia.
Gin-insister kara nga planted ro mga narekober kana nga items.
Nasayuran nga nabo-oe kay Señeres ro sangka sachet it shabu , 1,000 pesos nga marked money, cellphone ag iba pang kwarta nga ginasugid nga kabak-eanan it baligya nga isda.
Aminado ro suspek nga dati imaw nga user ag kaibahan sa mga drug surrenderees sa andang lugar nga nagtapos sa community-based rehabilitation program , kun sa siin nakataeana kunta nana nga pagabatunon sa disyembre ro pang-kapital sa anang negosyo halin sa DSWD para sa eubusan nga pagbag-o it kabuhi.
Naging kabulig it PDEU sa operasyon ro Numancia Police Station.
Samtang, ginpahayag man ni PMaj Frensy Andrade, hepe it PDEU nga haeos tatlong domingo eon nanda nga ginasubaybayan ro suspek.
Gina-obra man sigon kara nga front ro pagbaligya it isda para sa anang illegal nga aktibidad kun sa siin ro anang area of coverage hay ro Numancia, Makato, Tangalan ag Lezo.
Ginatumod pa sigon nanda kon dati eon nga naka-avail sa plea bargaining agreement ro suspek.
