KALIBO, Aklan–Nagapati ro sangka Football Enthusiast nga sarang makabawi it Philippine national football team nga Filipinas sa nagahilapit nga 2023 FIFA Women’s World Cup.
Raya hay kasunod it kapas-eawan it koponan sa alima it mga high ranking team nga Wales, Scotland ag Iceland sa Pinatar Cup nga ginhiwat sa San Pedro Del Pinatar, Spain halin Pebrero 15 hasta 21.
Suno kay David Abella, sangka Football Enthusiast nga personal imaw nga nag-adto sa lugar agud nga makit-an ro pagsabak sa torneo it women’s team kaibahan ro iba pang mga Pinoy halin sa nagkaeain-eain nga parte it kalibutan.
Nasakitan sigon imaw nga makit-an ro pagkapiyerdi it national football team apang kaparte raya it andang journey.
Ro katuyuan sigon it Pinatar Cup hay para makita ro mga error it sangka koponan, ma-improba ro andang depensa ag kapasidad nga makabulig sa andang preparasyon para sa World Cup.
Matueopangdan nga kaibahan ro Filipinas sa World Cup kung siin kaibahan nanda sa group A ro New Zealand, Norway ag Switzerland.
Magiging host it FIFA Womens World Cup ro Australia ag New Zealand sa buean it Hulyo.
