Ginabuebanta nga kapin sa P1.5M ro gin-aywan nga danyos it nag-eontad nga sunog kahapon sa sangka fruitstand sa may bahin it Brgy. Bulwang, Numancia.
Raya ro ginpahayag it tag-iya it fruitstand nga si Jomer Francisco.
Owa sigon imaw kat matabo ro insidente kung sa siin anang mga onga eamang ro naaywan para magbantay sa andang pwesto.
Nasunog sigon ro haeos tanan nga mga kagamitan nanda kaeakip eon ro mga prutas nga bag-ong restock eamang.
Suno kay Francisco nga nagabalor eagi it kapin sa P200,000 ro pakwan nga bag-ong abot aeamang ko syang adlaw.
Sa mayad nga swerte, owa it naninahan ag eowas nga nakahalin sa lugar ro mga onga ni Francisco.
Nasayuran nga ro tatlong dag-on nga onga kara ro nakapan-o sa pag-umpisa it sunog sa may pangaywang panaegan it andang pwesto.
Sa pihak nga parte, bandang 1:40 it hapon ginasugid nga napan-ohan ro pag-umpisa it sunog ag gindeklarang fire out bandang 2:10 it hapon.
Suno kay FO1 Jose Marie Ebanbueva it Bureau of Fire Protection ukon BFP-Numancia nga bangud sa nagkaproblema ro sambilog nandang firetruck hay ginkinahangean nandang magpangayo it bulig sa pwersa it BFP-Kalibo.
Samtang, nagresponde man sa lugar ro mga firetruck it Numancia, Banga, Malinao ag Makato kaibahan eon man ro MDRRMO Numancia, Numancia PNP, Akelco ag iba pa.
