KALIBO, Aklan—Eubos ro pagkadismaya it sangka pamilya matapos nga owa gihapon ma-operahan ro alima it andang pasyante nga naeukpan it whistle bomb ko bespiras it bag-ong dag-on ag presente sa makaron nga naka-confine sa Aklan provincial hospital.
Suno kay Charlie Merced Tasoy, haeos 12 diyas eon ro nagtaliwan apang owa gihapon ginpaidaeom sa operasyon ro anang asawa nga si Melchor Tasoy, 41-anyos, residente it Brgy. Mataphao, New Washington.
Suno kana, makapilang beses eon nga napaiway ro operasyon it biktima kung siin nagareklamo eon raya sa pagsakit it anang tiyan tuga it fasting.
Madumduman nga gindaea sa Aklan Provincial Hospital si Tasoy ko Disyembre 31, 2021 matapos nga maeukpan it whistle bomb ro anang tuo nga alima.
Ginasugid nga dungan nga ginsindihan it biktima ro daywang whistle bomb direkta sa anang alima.
Haeos ro kuma-ingking eon lang ro nabilin sa tuo nga alima it biktima tuga it mabaskog nga impact it pag-eupok.
Nagaeum man ro pamilya nga ma-operahan eon ro andang pasyente sa mas madali nga tyempo agud nga makauli eon raya sa andang panimaeay.
