Sangka ginang ro nadangop sa bombo radyo agud nga ireklamo ro pamunuan it Taba-ao primary school sa owa pag-release sa report card it anang daywang gumankon nga naga-eskwela sa nasambit nga eskwelahan.
Suno kay mrs. amy sisno nga kinahangean eon nanda nga i-transfer ro anang mga gumankon bangud nga magapasueod eon ro mga raya sa Grade 5.
Apang ginhawiran ro report card it mga raya bangud sa patong-patong nga baeayran it mga estudyante umpisa ko 2016 hasta 2022 kamana man nga kon amat eamang nga nagapasa it module.
Gintaw-an sigon sanda it palugit it teacher- in-charge nga hasta sa nobyembre agud nga ma-fully paid ro andang baeayran nga naga-abot sa 1,660 pesos sa sambilog ag 2,164 pesos sa sambilog pang gumankon kun sa siin kaabuan kara hay penalty sa pirmeng owa pagtambong it ama it mga unga sa Parents-Teachers Association.
Nakasugtan sigon it PTA nga magasukot it multa nga 50 pesos sa kada absent it mga ginikanan.
Nagapamalibad suno kana nga magbayad ro ama it mga learners bangud nga owa sanda it kwarta.
Makaeoeo-oy suno kana ro anang mga gumankon kon indi maka-eskwela.
Mag-eowas kanda , may ap-at pa sigon nga ginikanan ro may kaparehong reklamo.
Sa pihak nga parte, gin-insister ni aileen omemaga , presidente it PTA it nasambit nga eskwelahan nga nag-abu ro baeayran it nasambit nga mga estudyante bangud sa owa nabayaran nga membership fee , multa sa pag-absent sa meeting it andang ginikanan, raffle ticket, baeayran sa tanod ag iba pa nga ginasukot it andang asosasyon.
Nag apela man sanda sa nga i-settle ro andang baeayran kadungan ro pag engganyo nga magtambong sa igapatawag nga meeting agud nga maklaruhan.
Samtang, depensa man it mga manugturo nga owa sigon sanda nagapakialam sa mga patakaran ag aktibidad it andang PTA.
Apang ginklaru nanda nga nakipag-angot eon sanda sa bacan elementary school nga ipa-enroll ro mga unga ag ipa-apas lang nanda ro report card .
