KALIBO, Aklan—Nagdangop sa Bombo Radyo ro sangka ginang agud nga ireklamo ro anang mister bangud nga owa sigon raya nagapadaea it sustento para sa andang tatlong ka mga unga.
Suno kay Renile Alvarez ag presenteng naga-istar sa San Remegio, Cebu nga kung indi eun maayos pa ro andang relasyon it anang mister hay gusto eamang nana nga magpaabot raya it insakto nga sustento para sa andang mga unga nga idto makarun sa anang puder.
Nag-umpisa sigon nga masamad ro andang pamilya kat nakaexperiensiya imaw it pagpanakit it anang mister.
Ginapahayag dugang nga masami nga naga-uli nga hilong ro anang mister ag makapilang beses man sigon imaw nga ginhana kara it sanduko.
Gina-alegar pa kara nga may ibang kalaguyo eun ro anang mister rason nga napaeayo eun ro anang boot sa anang kaugalingon nga pamilya.
Samtang, haom man sigon imaw nga makipagbalikan kara para sa andang mga unga apang kinahangean nga idto sanda mag-istar sa Cebu.
Sa pihak nga parte, gin-insister man ni Robinson Alvarez ag residente it Sitio Mabais, Barangay Archangel, Balete nga owa eun imaw naila pa mga makipagbalikan sa anang asawa nga si Renile Alvarez.
Suno kana nga indi eun nana matiis ro batasan it anang asawa.
Makapilang beses man sigon imaw nga ginpakahuy-an it anang misis.
Masami sigon imaw nga ginapabangdan kara nga may kabit apang sa matood hay owa imaw it ibang karelasyon.
Ginklaro man kara nga nagapadaea imaw it kwarta para sa anang mga unga.
Samtang, pag-isipan man sigon nana kung makipagbalikan pa imaw sa anang misis ukon indi.
