Kalibo Aklan —– Kalansay eon nga nakit-an sa Sitio Dinaot, Brgy. Man-up, Altavas ro sangka ginang nga nauna eon nga naireport nga naduea ko Enero 20, 2020.
Suno kay Patrolman Crisandy Maciling it Altavas Police Station, positibo nga ginkilaea ni Eduardo Victoriano, 52-anyos ro kalansay nga anang asawa nga si Eldie Victoriano, 43-anyos nga naduea may tatlong buean eon ro nakataliwan.
Ginpahayag dugang nga ginpamatud-an sigon it mister ro palatandaan nga tiko ro sangka tudlo it misis tuga it anang pagkapaso.
Sa pagpangusisa it pulisya sa mister, may sakit sa paino-ino ro ginang ag masami sigon raya nga nagawinarang apang ko ulihi hay uwa eon raya nakauli ag ginapatihan nga namatay raya sa gutom.
Una kara, nagreport sa taeatapan it pulisya ro nakakita sa kalansay nga si Ronelio Dela Vega bandang alas-7:00 it agahon ko Abril 25 it presenteng dag-on kon sa siin gilayon nanda nga gintawagan si Victoriano ag ginpakilaea kana ro nasapwan nga kalansay it tawo nga positibo man nanang ginkilaea nga anang asawa.
