Dismayado nga nagreklamo sa Kalibo Municipal police station ro sangka ginang matapos nga ginaalegar nga nabiktima it budol-budol kahapon sa banwa it Kalibo.
Natigayon nga nabuoe sa biktima ro anang bueawan nga mga alahas ag cellphone nga nagabalor it kapin sa P80,000.
Una sigon kara, ginpaeapitan ro biktima it sangka eaeaking suspek nga nagpakilaeang amigo it ana nga onga.
Naging kumpiyansiya sigon ro biktima matapos ro grabeng pakig-istorya sa suspek kung siin nagpromisa pa sigon raya nga pagataw-an imaw it mabahoe nga kantidad it kwarta rason nga nagsunod ro ginang sa suspek ag ginpasakay imaw sa anang saeakyan.
Ginpahukas sigon kana ro anang mga alahas ag ginbutang sa sangka pouch.
Nagbaylo sigon sanda it bag nga ginasugid nga may sueod nga kapin sa P200,000 nga kwarta ag nagpahayag ro suspek nga indi anay pagbuksan ro nasambit nga bag antes nga makabalik ro mga raya.
Apang makataliwan sigon ro pilang ka inoras hay owa gihapon ro mga raya nakabalik rason nga nagdesider ro biktima nga buksan ro bag ag sa anang kakibot nga puro mga papel ro sueod it nasambit nga bag.
Ro insidente hay ginpakamayad eon lang it biktima nga ireport sa taeatapan it pulisya para sa nagakaigong imbestigasyon.
Sa pihak nga parte, padayon ro pagpadumdum it mga otoridad sa publiko nga indi mag basta-basta it salig sa mga nakakasumaeang nga indibidwal nga bukon man it eubusan nga kilaea.
