KALIBO, Aklan—Sangka ginang ro naghana nga magpakamatay para eamang mapamatud-an sa anang mister nga uwa raya it ibang eaki nga karelasyon sa Brgy. Ogsip, Libacao.
Suno sa misis nga si Jenelyn Yatan Gandulan, 28-anyos, tubong T’Boli, South Cotabato nga masami sigon sandang naga-away it anang mister nga si Raymund Zorilla, 32-anyos ag parehong presenteng naga-istar sa nasambit nga lugar bangud sa selos.
Ginapabangdan sigon imaw it anang live-in partner nga may ibang eaki apang sa kamatuoran hay inde nana raya maobra sa anang mister bangud nga palangga nana raya nga mayad ag masako eamang imaw sa pag-alaga it andang onga.
Agud nga mapamatud-an nga saea ro pagduda it anang mister hay naghana raya nga utason ro anang kaugalingon nga kabuhi.
Apang, maswerte nga nakit-an imaw it anang mister ag insigidang gintabangan.
Sa makaron hay una eon sa maayos nga kondisyon ro ginang matapos nga gin-eapatan it medikasyon sa Aklan provincial hospital.//
