KALIBO, Aklan—Nagpaabot it reklamo sa Bombo Radyo Kalibo ro sangka ginang matapos nga makakas sa listahan it mga benepisyaryo it Social Amelioration Program ukon SAP it gobyerno.
Suno kay Loreta Maaba, sa legal nga edad ag residente it Brgy. Cubay Sur, Malay, nag-house to house validation sigon ro Department of Social Welfare Development (DSWD) kon sa siin kumpyansa sigon imaw kaibahan ro anang magueang nga si Norma Mirasol nga makabaton it financial assistance.
Kaangot kara, kat idto eon sigon sanda sa sueod it natungdan nga remittance center hay ginpurya sanda it MSWDO officer ag ginhambaean nga inde sanda makabaton bangud nga may nakita sigon ro validator nga may ikasarang sanda sa pangabuhi.
Ginpahayag dugang ni Maaba nga mga senior citizen eon sanda ag uwa man it ibang ginakitaan sa tunga it pandemya.
Mas mayad pa sigon nga uwa ginlistahan ro andang pangaean agud nga inde eon magsalig bangud nga napuno eon sanda it utang para eamang mapun-an ro andang kinahang-eanon sa pang-adlaw adlaw.
