KALIBO, Aklan—Sangka ginang ro nagpaabot it reklamo sa bombo radyo matapos nga gina-alegar nga owa nataw-an it hustisya ro anang reklamo sa andang barangay council.
Ro reklamo ni Mrs. Monina Besana, presidente it general PTCA it Mambuquiao Integrated School sa banwa it Batan hay nag-ugat sa mga ginasugid nga nagkaeaduea nga mga kahoy ag yero halin sa gin-repair nga pilang classroom it nasambit nga eskwelahan nga ginasugid nga ginbakae it daywang manugturo nga sanda man mismo ro nag-presyo.
Suno kana nga gindangop nana ro reklamo sa andang Barangay Council matapos nga buslahan it iba pang mga ginikanan angot sa nasambit nga hitabu.
Apang imbes suno kana nga nagatindog nga complainant hay imaw pa ro ginpa-summon ko ulihi it anang mga ginareklamo nga manugturo kaibahan ro head teacher nga si Mrs. Sosaly Sioco.
Imbes suno kana nga daywang teacher eang ro kaibahan sa anang reklamo hay ginpulihan imaw it iba pang manugturo sa andang pag-atubang sa barangay.
Ginpaeag pa sigon imaw it mga raya nga pagakasuhan ag posibleng makulong bangud sa gina-alegar nga “paninirang puri” nga anang gin-obra.
Gina-akusahan imaw nga nagapakalhit it mga saea nga impormasyon.
Gindugang pa ni Mrs. Besana nga ginapilit imaw it mga eakot nga teachers nga limpyuhan ro andang pangaean.
Gin-insister pa it mga raya nga owa imaw it kinamatarung nga mag reklamo bangud nga sanda ro may poder sa mga gamit sa sueod it eskwelahan.
Samtang, nagaduda sigon ro mga teachers nga may tawo nga sa likod it anang pagreklamo agud nga sanda hay samaran.
