Kalibo Aklan ——-Sangka ginang ro nagpangayo it bulig sa Bombo Radyo Kalibo matapos nga ginbaeabagan sa Caticlan Jetty Port ro anang 71 anyos nga asawa ag 25 anyos nga unga nga makabig nga mga Locally Stranded Individuals (LSI’s) halin sa Metro Manila .
Suno kay Mrs. Gemma Villardo it Brgy. Morales Balete nga mag-eowas nga gina-usuyan it letter of acceptance halin sa LGU-Balete hay ginapangayuan man ro anang mag-ama it negatibong resulta it RT-PCR test .
Gin-abisuhan suno kana ro anang asawa nga si Mr. Alfred Villardo nga kon indi makompleto ro mga requirements hay igapabalik sanda sa Batangas Port .
Nagakabaeaka sigon sanda nga magutuman bangud nga owa eon sanda it kwarta ag owa man it matiniran kon pabalikon sa Manila .
Resulta it rapid test eamang sigon ro andang daea rason nga pag-abot sa Aklan hay gin-usuyan sanda it RT-PCR test result bilang bag-ong requirements it Provincial Government sa mga LSI’s nga naga-uli .
Samtang, eubus man ro pagpasaeamat it ginang matapos nga ginsabat ni Aklan 1st District Congressman Carlito Marquez ro gastos sa swab test it mag-ama pinaagi sa pag facilitate it Bombo Hanay Bigtime.
Gin-abisuhan man nana ro mag ama nga magsunod sa mandu it Provincial Health Office eabi eon ro pagpaidaeum sa 14-days nga home quarantine matapos nga parehong asymptomatic ro daywa.
Mabahoe man ro naging pagpasaeamat it 71 anyos nga si Alfred Villardo sa bulig ni Congressman Marquez ag Bombo Radyo bangud sa kahigayunan nga maka-uli eon sanda sa andang baeay.
