KALIBO, Aklan—Mabahoe ro pagpasaeamat it sangka 47 anyos nga ginang nga si Edna Gumban Natalio, residente it Brgy. Pagsanghan, Banga sa bulig pinansiyal nga gintau kana it sangka riders club sa Aklan pinaagi sa andang ginpatigayon nga charity ride.
Suno kana nga nagakinahangean imaw nga ma-operahan eagi sa Philippine General Hospital sa Metro Manila, apang dapat nga makatipon anay it haeos 900,000 pesos.
Marso 10 suno kana kat gindaea imaw sa provincial hospital matapos nga makabatyag it grabeng sakit it ueo.
Dayun sigon imaw nga gin-refer sa sangka private hospital sa Kalibo agud nga ma-obserbahan sa ICU.
Gin-confine man imaw sa Western Visayas Medical Center ag ginpaidaeum sa CT-scan/angiogram kun sa siin na-diagnose na may pilang ugat ro nag-eupok nga naga-konekta sa anang ueo ag mata tuga it sobra kataas nga blood pressure.
Raya man ro rason kon ham-an nga naghaeok ro anang tuo nga mata.
Sa ap-at nana nga unga hay daywa pa eamang ro may trabaho ag napilitan ro anang ikatlong unga nga magpundo it pagtuon agud nga mag alaga kana.
Ro anang asawa sigon hay owa it permanenteng income sa anang ginatrabahuhan nga vulcanizing shop .
Sa makaron hay padayun nga naga apela it bulig pinansiyal ro ginang agud nga ma-schedule eon ro anang operasyon.
Sa pihak nga parte, ginpahayag ni Walberto Irabon Jr., it brotherhood of Aklan riders nga nagpatigayon sanda it charity ride agud nga makatipon it pondo nga makabulig sa pagpa-opera ni Mrs. Natalio.
Sa makaron hay nakatipon eon sanda it kapin sa P22,270 halin sa andang mga miyembro, apang ginaeauman nga raya hay madugangan pa bangud nga may iba pang naga-message kanda .
Suno kana nga gintukod ro andang grupo ko 2017 ag ko 2018 hay nag-umpisa ro andang charity ride kun sa siin maabu eon man ro andang mga nabuligan .
