KALIBO, Aklan–Nag-uli it mga medalya sa probinsya it Aklan ro sangka grade 7 student matapos ro madinaeag-on nga pagpasakop sa Batang Pinoy National Championships 2022 sa Vigan Ilocos Sur nga nag-umpisa ko Disyembre 17 ag nagtapos ko Disyembre 21, 2022.
Suno sa Coach nga si JB De Leon, nakuhit ni Nuche Veronica V. Ibit it banwa it New Washington ro Gold medal sa kabilugan nga 96 participants sa swimming sa category nga 50 Meter Freestyle; Silver medal ro anang naangkon sa kabilugan nga 112 Participants sa 100 Meter Freestyle ag naging 4rth placer imaw sa category nga 50 Meter Backstroke, 50 Meter ButterFly ag 200 Meter.
Ginpahayag nga ro andang expenses hay mismong ro mga atleta ro naggastos ag uwa sigon it cash incentives ro nasambit nga pahampang.
Apang, mabahoe eon nga premyo ro pagkakuhit nanda it mga medalya ag ro Aklan hay una sa ika-31 nga pwesto sa medal tally nga nakabueo it kabilugang nga 17 ka mga medalya nga ginakaeakipan it ap-at ka mga gold medals, an-om nga silver ag pito nga bronze medals.
