KALIBO, Aklan–Preparado eon ro sangka grupo nga magpasakop sa nakataeana nga opening salvo it Kalibo Ati-atihan festival sa maabot nga Oktobre 8, 2022.
Suno kay Chris Diangson, tribal leader it pride of Libtong sa tribal category big group nga nagahueat eon lang imaw nga magpatawag it hinun-anon ro lokal nga gobyerno para masayuran nanda kon anu ro magiging plano kanda nga mga grupo.
Sa kamatuoran suno kana hay haom eon ro andang costume ag maging ro mga drum set hay ginpang-ayos eon.
Sa makaron sigon hay uwa pa gid sanda it tul-id nga impormasyon kon anu ro magiging set-up nanda sa opening salvo.
Gindumdom man kara nga ko nagtaliwan nga mga dinag-on kat uwa pa nag-agi ro pandemya hay buean it Pebrero pa eamang hay nagapatawag eon it meeting ro festival organizer para man sa andang pagpahaom it andang grupo.
Nasayuran nga ginapursige makaron it LGU Kalibo nga madayon eon ro kasadyahan sa Ati-atihan festival matapos ro haeos daywang dag-on nga pagpaiway kara bangud sa pandemya.
