KALIBO, Aklan—Sangka guest nga halin sa Metro Manila nga positibo sa coronavirus disease 2019 ukon covid 19 ro posibleng nakatapon it virus rason nga gulping tumaas ro kaso sa isla it Boracay.
Raya ro ginpahayag ni Punong Brgy. Jayson Yap Talapian it Balabag, Boracay.
Suno kana nga naki-party ro guest sa sangka bar kun sa siin may sangka disc jockey ukon DJ ro nagtambong nga ginapatihan nga naki-party-party pa sa ibang grupo.
Nasayuran nga puro nagpositibo ro ibang mga high-risk contacts kara nga ro iba hay mga residente ag mga negosyante sa isla.
Ginasugid nga kat nakabalik eon sa Manila ro guest kat masayuran nga positibo imaw sa sakit.
Madumduman nga nagpatuman si Mayor Frolibar Bautista it 14-diyas nga lockdown sa zone 5 ag 6 sa barangay Balabag agud nga matapna ro pagkalhit it virus.
Magadepende sa sitwasyon kon pagabawion sa Abril 10 ro lockdown ukon paeawigon pa.
Nauna eon nga ginkumpirma it Municipal Health Office ro pag-angkon it 25 nga kaso Covid-19 sa nasambit nga mga gin lockdown nga lugar.
Ginpakalma man ni kapitan Talapian ro publiko bangud nga ro tanan nga nagpositibo sa virus hay gindaea eon sa quarantine facility sa banwa it Kalibo ag ginpaidaeum sa swab tests samtang nagapadayun ro contact tracing kun sa siin ro ibang naki-party hay boluntaryo man nga nagpakita sa LGU malay ag sa BHERTS.
