KALIBO, Aklan—Nagpahayag it kahauman ro sangka hog raiser nga i-pullout ro andang mga alagang baboy matapos ro gin-isyu nga cease and desist order it lokal nga gobyerno it Kalibo.
Suno kay Ludovico Pabeleo, sambilog sa mga naga-alaga it baboy sa Brgy. Andagao, Kalibo nga haum imaw nga halinon ro andang mga alagang baboy sa ibang lugar kamana man nga ro iba hay ginbaligya eon nanda.
Sa kamatuoran suno kana hay may ginapaubra eon sanda nga bag-ong kulungan it baboy nga aprubado it zoning.
Apang, nag-apela man raya sa mga natungdan nga parehason ro pagtratar bangud maabu sigon sanda nga naga-alaga it baboy apang sanda eamang ro gin-isyuhan it nasambit nga order.
Nasayuran nga ginreklamo ro mga alagang baboy ni Pabeleo bangud sa mabaho nga hugom nga nakaka-perwisyo sa mga residente maeapit sa lugar.
May kaangtanan kara, ginpaathag ni Marylou Salido, Legal Assistant II it LGU-Kalibo nga mabuhay eon nanda nga gintaw-an it order ro pamilya Pabeleo kung siin nataw-an eon sanda it palugit.
Kainang agahon kat nagserbi sigon sanda it Executive Order kung siin nagpromisa ro mga raya nga boluntaryong maga-pullout it andang mga alaga makaron nga adlaw.
Nakataeana nga daehon ro mga baboy sa slaughterhouse it banwa.
Gin-insister man kara nga ginasunod eamang nanda ro nakabaehag sa Sanitation Code of the Philippines ag Municipal Sanitation Code.
Ginpahayag dugang nga naga-abot sa 32 ro mga tag-ana it baboy nga ginpadaehan nanda it cease and desist order kung siin kaabuan sa mga raya hay padayun gihapon nga naga-alaga maskin natapos eon ro gintao nga palugit.
