KALIBO, Aklan—Ginapabugae makaron it anang pamilya ro sangka miyembro it Kalibo Auxiliary Police (KAP) matapos nga uwa nagduha-duha nga iuli ro kahita nga anang nakit-an nga may sueod nga mabahoe nga kantidad it kwarta.
Ginakabig makaron nga huwarang Aklanon si Orville Taay matapos nga nagpakita it manami nga pag-inugali ag pagiging tampad nga tawo matapos nga ginpasaalima nana sa mga katapo it kapulisan sa Kalibo Municipal Police Station ro sangka kahita nga may sueod nga kapin sa P44,400 pesos nga anang nakit-an sa karsadahon nga sakop it New Buswang, Kalibo.
Suno kana, maskin nagakinahang-ean imaw it kwarta bangud sa nakataeana nga daehon sa Iloilo ro anang onga hay uwa gid nagsueod sa anang isip nga intrahan ro nakit-an nana nga kwarta bangud sa ginadumdom kara ro nadueaan nga indibidwal nga base eubus pa nana nga kinahang-ean ro nasambit nga kantidad.
Ginpahayag dugang nga ginhimo eamang nana ro nagakadapat agud nga maibalik sa tamang tag-iya ro kwarta rason nga insigida imaw nga nagpadueong sa taeatapan it pulisya agud nga iuli raya.
Nakasayod sigon raya kon man-uno kalisod magpangita it kwarta kapin eon sa makaron nga tyempo rason nga uwa imaw nagdaywang isip nga iuli raya bangud sa posibleng konsensyahon pa imaw kon gin-intrahan nana ro bagay nga bukon it ana.
Sa makaron hay padayon pang ginatumod it pulisya ro tag-iya it nasambit nga kahita.//
