KALIBO, Aklan–Humakot it libo-libong views ro nagviral nga komposisyon it sangka Ibajayhanon matapos nga maghimo it Aklanon version it kantang ‘Jopay’.
Suno kay Lewis Tumbukon Conanan, sangka composer/songwriter ag tumandok it Brgy. Laguinbanwa, Ibajay nga nag-umpisa imaw nga magka-interes sa pagkriar it mga kanta kaeakip ro original Aklanon composition sa edad nga 13.
Masami sigon nga nakakasueat imaw it kanta base sa anang emosyon ukon eksperyensya.
Samtang, kaeabanan nga nakaka-kriar imaw it melody ag lyrics kada nagamaneho it motorsiklo kung siin insigida imaw nga nagapundo para magrecord.
Si Conanan hay presenteng nagatukar sa mga event kaibahan ro anang banda sa Boracay ag Kalibo.
May kahigayunan man sigon nga solo imaw nga nagaperform depende sa kinahang-eanon it kliyente.
Mag-euwas sa pagiging vocalist hay naga-beat box man imaw.
Gintaw-an man kara it punto nga naga-enjoy imaw sa pagiging musician ag ginakabig eon nana raya bilang passion.
Aminado man imaw nga malisod nga magpromote it kanta bangud sa kakueangan it outlet ag pinansyal.
Samtang, plano sigon it andang banda nga maghimo it original Aklanon song sa paeaabuton.
Nasayuran nga sambilog man imaw sa mga nagpasakop sa Bombo Music Festival ko 2018 apang owa naging mapaeapad nga makasueod sa finals.
