KALIBO, Aklan—Sangka improvised nga baril ag mga bala ro ginsurender it sangka mangunguma halin sa probinsiya it Antique sa mga tawuhan it 3rd Maneuver Platoon sa Barangay Agdugayan, Ibajay.
Sangka unit it ginapatihan nga homemade 7.62 mm single-shot rifle ag limang mga bala nga owa it mga markings ro ginsurender it owa ginpangaeanan nga eaeaki nga gindaea sa Ibajay Municipal Police Station para sa nagakaigo nga documentation.
Ro nasambit nga armas ag mga bala hay nakataeanang iga-turn over sa Responsible Supply Police Non-Commissioned Officer (RSPNCO) it 2nd Aklan Provincial Mobile Force Company para sa nagakaigo nga disposisyon.
Ro nasambit nga pagsurender it baril ag mga bala hay naging posible matapos ro pagtinguha ag madinaeag-on nga kampanya it Philippine National Police, eabi eon it 2nd Aklan PMFC sa idaeum it OPLAN TKAL ag proyektong “ARMAS ISLAN BUGAS”.
Tuyo kara nga maengganyo ro publiko nga i-turn over ro mga loose firearms ag buligan nga mapabilin ro peace and order sa komunidad.
Samtang, ginpaathag ni P/Lt. Col. Donnel Regis, Force Commander nga ro pagtago ukon paghupot it mga bukon it lisensyadong armas hay illegal, rason nga nagakadapat nga isurender raya sa mga otoridad agud nga malikawan ro anuman nga kapahamakan sa publiko.
