KALIBO, Aklan–Nagapangison nga nagdangop sa broadcast center it Bombo Radyo Kalibo ro sangka ina para magpanawagan it bulig angot sa hospital bill it anang unga nga nagabalor it kapin sa P741, 537.
Suno kay Rosemarie Costudio, residente it Brgy. Mantiguib, Makato nga na-confine ro anang unga sa Panay Health Care ko Abril 17 matapos nga madisgrasya sa ginasakyan nga motorsiklo sa national highway nga sakop it banwa it Numancia.
Makataliwan sigon ro siyam nga adlaw hay daeayon nga binawian it hueam nga kabuhi ro biktima nga nakilaea kay Junmar Costudio, 24-anyos bangud sa fatal nga lastro sa anang ueo.
Aminado si nanay Rosemarie nga indi nanda masarangan ro masyadong mabahoe nga hospital bill rason nga ginpakamayad nanda nga magpaabot it panawagan para maskin paalin hay may makabulig kanda.
Sambilog pa sa ginaproblemahan it pamilya hay ro pagpa-eubong sa biktima bangud nga owa pa ma-release ro death certificate.
Nagapangayo sigon it collateral ro ospital antes nga i-release ro nasambit nga dokumento.
