Kalibo Aklan—— Sangka ina ro nagpangayo it bulig sa Bombo Radyo agud nga ma-rescue ro anang unga nga nagatrabaho bilang domestic helper sa Oman .
Suno kay Mrs. Lealyn Capoy , ina it Overseas Filipino Worker (OFW) nga si Lindy Capoy, 27 anyos, sangka single parent nga may daywang unga, residente it Brgy. Nalook, Kalibo nga grabeng pag-antus ro gina-agyan makaron it anang unga sa alima it anang unga nga alaga sa Oman .
Nagpadaea sigon it video kanda ro anang unga nga nagapakita it anang mabahoe nga gaob sa batiis matapos nga bunaean it shower hose ag ko ulihi hay ro mga nina sa anang butkon matapos nga gina-alegar nga ginbinuno it ballpen it anang alaga.
Naghalin sigon it nasyon ro OFW ko Enero 1, 2020 ag nag-agto sa Oman matapos nga mag-apply sa sangka agency sa Manila.
Mayad man sigon ro anang employer , apang masyadong sutil ag mapintas ro andang unga nga anang gina-alagaan.
Gindaea sigon imaw it anang mga employer sa anang agency, apang maskin idtu hay ginamueay man imaw ag ginahana nga ipasueod sa ibang amo.
Sa pihak it anang pagpamalibad bangud sa trauma, napilit imaw nga maisaylo sa ibang employer hasta nga naabutan eon it lockdown tuga it COVID 19 pandemic ag nagpabilin sa euyo it agency.
Ginpaabot sigon kanda it anang unga nga indi anay magapadaea it sweldo agud nga tipunon nga pangbakae it plane ticket pauli sa oras nga magbukas ro airport idtu, apang gin-hold raya makaron it anang agency.
Kada tawag suno kana it andang unga hay pirme raya nga nagatangis ag gusto eon nga mag-uli.
Ginasukot man sigon sanda it pagkaon it andang agency rason nga dugang nga problema kana makaron.
Nasayuran nga raya ro kauna-unahan nga pag-trabaho sa abroad it OFW sa handum nga mapatindugan it disente nga baeay ro anang pamilya .
Suno kay Mrs. Lealyn nga sang beses eamang nakapadaea it kwarta ro anang unga ag nakaangkon raya it problema sa anang trabaho.
