KALIBO, Aklan—Ginpaidaeum eon sa disinfection ro sangka inn sa banwa it Kalibo nga magaserbing quarantine site para sa mga kalibonhon nga maga-uli matapos nga maigpit sa ginpatuman nga lockdown tuga it coronavirus disease ukon COVID-19.
Suno kay Kalibo mayor Emerson Lachica nga ro county inn nga may 15 hasta 18 nga kwarto hay dating gingamit nga ilistaran it mga frontliners nga nagatrabaho sa Aklan provincial hospital.
Libre sigon nga igapagamit raya sa mga returning kalibonhon.
Ginpasiguro man kara nga igatau sa mga maga-agi sa quarantine ro andang mga kinahangeanon.
Nauna eon nga gintaeana it munisipyo nga quarantine area ro andang evacuation center, apang kueang raya sa pasilidad.
Ro Aklan hay ginpabilin gihapon sa general community quarantine maskin nga na-classify eon raya sa low risk area.
Ginpadumdum man nana ro tanan nga indi magpakampante sa pihak nga covid free eon ro Aklan bangud nga malisod kon makaangkon it 2nd wave it infection.
Mabahoe man ro anang pagpasaeamat bangud nga owa nakaangkon it local transmission sa Kalibo ag bilog nga probinsiya it Aklan.
