KALIBO, Aklan—Sangka eaeaki ro ginreklamo it pagpanakit sa Brgy. Bulwang, Numancia.
Ginkilea ni PSSgt. Marlon Del Rosario ro tagreklamong si Dave Cristopher Abarco, 22-anyos samtang ro ginatumod nga suspek hay si Gerald Basid, 34-anyos ag parehong residente it nasambit nga lugar.
Base sa report, una sa idaeom ko impluwensya it aeak si Basid kat nagsueod raya sa compound nanday Abarco ag nagpang-ayat it inaway.
Nakapanago ro biktima apang ko ulihi hay ana raya nga nakit-an ag ginbayo.
Si Basid hay nagwala pa sa sueod it compound hasta nga pati ro kaeapit baeay hay nag-awat sa andang kumusyon apang uwa nagpamati ro suspek hasta nga gintawgan eon raya it police assistance.
Sa pagresponde it pulisya, insigidang gindaea sa Numancia Police Station si Basid kon sa siin imaw sa makaron temporaryong nakakulong para sa nagakaigong disposisyon.
