Ginpahalin it Miss Universe Philippines (MUPH) Organization ro sambilog sa mga kandidata kara sa 2026 pageant, kasunod it imbestigasyon sa gina-alegar nga bukon it angay ag bagay nga batasan it kandidata nga owa anay ginpangaeanan.
Sa opisyal nga pahayag it MUPH, ginasugid nga nakabaton sanda it mga reklamo kontra sa nasambit nga kandidata apang owa eon ginpahayag ro bilog nga detalye it insidente.
Ginpaidaeum ro mga reklamo sa maid-id nga pag-usisa kamana man nga ginpangayuan ro eakot nga kandidata it verbal ag written letter angot sa ginpakita nga batasan.
Owa sigon nagakabagay sa respeto ag propesyonalismo it organisasyon ro anang pagginawi.
Bangud kara, nagdesisyon ro MUPH Organization nga indi eon pagpasugtan nga magpadayon sa beauty contest ro kandidata.
Gintaw-an it importansiya it organisasyon ro andang katuyuan nga mapabilin ro sangka aktibo ag positibo nga palibot para sa tanan nga mga partisipante sa pageant.
Bangud kara, halin sa orihinal nga 51, may una eon lang nga 50 nga mga kandidata para sa Miss Universe Philippines 2026 nga magapaindis-indis sa coronation night nga pagahiwaton sa Mayo 1, 2026, sa Mall of Asia (MOA) Arena sa Pasay City.
