KALIBO, Aklan–Sangka kandidato sa pagka-kongresista sa unang distrito ro owa nakatambong sa ginpatigayon nga political forum it Kapisanan ng mga Brodkasters ng Pilipinas (KBP)-Aklan Chapter para sa mga kandidato nga nagapadaeagan sa provincial level makaron nga adlaw , Abril 29, 2022 sa ABL sports and cultural complex.
Suno kay Mr. Apolonio Zaraspe, Chairman it KBP-Aklan Chapter nga nagpadaea sanda it imbitasyon sa tanan nga mga kandidato halin sa sangguniang panlalawigan hasta sa gobernador ag bise gobernador kamana man ro kongresista sa una ag ikaywang distrito ag sangka kandidato eamang ro nagpahayag nga indi makatambong.
Sa pihak kara, samtang, mabahoe ro andang kalipay ag pagpasaeamat sa temprano nga pag-abot it accreditation halin sa regional office it commission on elections ukon comelec para sa paghiwat it nasambit nga aktibidad.
Mabahoe suno kana nga pabor sa mga nagapa-ilihir nga kandidato ro nasambit nga forum agud nga mabatian ro andang mga plataporma de gobyerno, mga plano ag iba pa sa masunod nga tatlong dag-on.
Ro mga panelist sigon ro magapangutana sa mga kandidato ag magabuoe man sanda it pangutana online.Samtang, ro mga kandidato sa pagka-Board member hay pagataw-an it tig-tatlong minuto para magpakilaea ag magpaathag it andang plataporma de gobyerno.
Ginadumilian sigon sa forum ro pag-boo ukon pagdaea it mga placards ukon signs nga makapaeain sa sangka kandidato ukon partido.
