KALIBO, Aklan—Sambilog eamang ro kinagamo nga natabu sa ginpatigayon nga opening salvo it Sto. Niño Ati-Atihan Festival 2023 ko Sabado nga adlaw.
Suno kay P/Major Jason Belciña, hepe it Kalibo Municipal Police Station nga naging matawhay sa pangkabilugan ro maghapon nga event nga nagbuhay hasta it aga-aga ko domingo nga adlaw.
Apang ro nasambit nga assessment suno kana hay para eamang sa peace and order ag owa pa ro overall event.
Kaibahan sa nailista it PNP hay ro natabu nga rambol sa sueod it Kalibo Pastrana Park, apang makabig sigon raya nga isolated case.
Owa eon gindetalye ni Belciña ro natabu bangud nga daywa sa eakot sa insidente hay mga menor de edad nga insigida man nga nadakpan.
Kapin sa 40 man suno kana ro andang nadakpan nga nag-eabag sa local ordinance angot sa vaping ag smoking in public places sa sueod it festival area.
Haeos tanan man hay nagsunod sa pagbawae sa pagbaligya it mga de-botelyang ilimnon sa sueod it festival zone.
Angot kara, ginpasaeamatan nana ro naging kabulig nanda sa pagbantay sa peace and order situation kaibahan ro mga katapo it auxiliary police ag ro guardians.
Sa pihak nga parte, nagaeaum si Belcina nga maaprubahan ro andang gin-request nga augmentation force it Police Regional Office ukon PRO-6.
Pagahinyuon man nanda ro bulig it Philippine Army.
