KALIBO, Aklan—Gusto it sangka konsehal sa banwa it kalibo nga makaangkon it bastanteng sueod nga kwarta ro tanan nga mga automated teller machines ukon ATM makaron nga nakapaidaeum ro bilog nga probinsiya it aklan sa modified enhanced community quarantine ukon MECQ.
Ginpaathag ni SB Mark Vega Quimpo nga maabu nga mga reklamo ro andang nabaton ko nagtaliwan nga domingo matapos nga pilang mga ATM machine ro owa it bastanteng pondo rason nga naging mabudlay ro pag-withdraw it andang mga kliyente.
Bangud kara, sangka resolusyon ro gindihon sa sangguniang bayan agud nga hinyu-on sa mga banko nga obrahon nga 24/7 ro serbisyo it andang mga ATM machines.
Nakipag-angot eon man sigon sanda sa mga managers it mga banko agud nga mataw-an it aksyon ro nasambit nga problema.
Nasayuran nga umpisa nga ginpaidaeum sa MECQ ro aklan hay naging limitado ro operasyon it mga banko nga alas-8 it agahon hasta alas-2 it hapon.
Mag-eowas kara, nakaangkon pa it kahigayunan nga pilang banko ro sunud-sunod nga nagsarado matapos nga pila sa andang mga empleyado hay nagpositibo sa COVID-19.
Sa makaron hay may una nga 28 nga mga banko sa Aklan.
