Gin-anunsyo it Dr. Rafael S. Tumbokon Memorial Hospital nga nagpositibo sa RT-PCR test for SARS COV 2 ukon COVID-19 ro sambilog sa andang laboratory staff.
Ro pasyente hay sangka 22-anyos nga babaye ag residente it banwang Kalibo.
Bangud kara, pagalimitahan sigon nanda ro mga bag-ong admission sa ospital apang padayun gihapon sanda nga magabaton it pasyente sa Out Patient Section (OPD), emergency surgical/obstetrical ag iba pang medical condition nga nagakinahang-ean it nagakaigo nga pagtatap.
Samtang, may pila ka mga areas ro temporaryo anay nga igasarado ag pagapundohon ro operasyon para sa igapatigayun nga disinfection.
Sa Setyembre 8 hasta 9 igasarado anay ro Laboratory, Blood Bank, Admitting section, Pharmacy, Central Supplies Room ag Molecular Laboratory kamana man sa Setyembre 10 hasta 11 hay ro ICU, SICU, MICU, HD, OR, DR, NICU ag PICU samtang sa Setyembre 12 hasta 13 hay ro OPD, Admin Offices, ER, Dietary, Billing ag Cashier.
Sa Setyembre 14 hasta 15 mat-a hay ro Pedia Ward, Surgical Ward, PH/Ortho, OB ag ISO kamana man sa Setyembre 16 hasta 17 hay nakataeanang igasarado ro 2nd floor, 3rd floor ag iba pang office it Provincial Hospital.
Sa makarun hay nakalista eon kabilugan nga 35 nga kumpirmadong kaso it COVID-19 ro probinsya it Aklan.
