KALIBO, Aklan—Tiempo eon gid man agud nga ipatuman ro maintenance activities sa air traffic management system.
Raya ro naging pahayag ni Bombo International Correspondent Denmark Suede it Sydney, Australia.
Suno kana nga bilang sangka lisensiyadong piloto, importante ro nasambit nga tikang agud nga malikawan nga matabu it uman ro naexperiensiyahan nga shutdown sa Ninoy Aquino International Airport ukon NAIA ko New Year’s Day ag Labor Day ko Mayo 1, kun sa siin maabu nga mga pasahero ro naapektuhan matapos nga ginkansela kamana man nga na-delay ukon na-divert ro andang mga flight.
Nasayuran nga magapatuman it airspace shutdown ro Pilipinas sa Mayo 17 agud nga taw-an it daean ro major activity.
Raya hay nagakahueugan nga owa it makaeupad sa airspace it bilog nga Pilipinas sa raya nga tiempo.
Gindugang pa ni Suede nga kunta sa pagahiwaton nga scheduled maintenance ukon replacement it UPS it air traffic management center hay mabutangan raya it back-up system.
An-um nga oras ro magiging shutdown umpisa alas-12:00 it tungang gabi-i hasta alas-6:00 it agahon sa Mayo 17.
