Gin-anunsyo it Guinness World Records nga ro sangka madre nga pranses ro opisyal eon nga naging pinakamagueang nga tawo sa bilog nga kalibutan nga nagakabuhi sa edad nga 118 anyos ag 73 diyas.
Ginpahayag it Guinness nga si Sister Andre, sangka madre nga natawo bilang si Lucile Randon ko Feb. 11, 1904, hay opisyal nga ginbansagan nga oldest living person kasunod it pagkamatay it Japanese nga babaye nga si Kane Tanaka sa edad nga 119 years and 107 days old.
Si Sister Andre nga ginbayluhan ro anang pangaean matapos nga maging madre ko 1944, hay ginakilaea man bilang world’s oldest nun it Guinness.
Imaw ro ikaywa sa pinakamagueang nga tawo sa France ag ikatlo sa bilog nga Europa base sa record.
Ro madre nga medyu bungoe eon ag nagagamit it wheelchair hay nagpahayag nga ginatinguhaan nana nga maging aktibo sa gihapon ro anang isip.
Suno sa mga staff sa retirement home ni Sister Andre nga ginataw-an sa gihapon nanda raya it sangka baso it wine kada adlaw.
Nasayuran nga ro ginkilaea nga pinakamagueang sa bilog nga kalibutan hay ro kaparehong pranses nga si Jeanne Louise Calment nga natawo ko 1875 ag namatay sa edad nga 122 anyos ag 164 diyas.
