KALIBO, Aklan—Nagpangayo it bulig sa Bombo Radyo Kalibo ro sangka residente it Sibuyan, San Fernando, Romblon agud nga mausoy ro anang igkampod nga mangingisda nga naduea umpisa pa ko Nobyembre 4 sa kaeawran nga sakop it Sibuyan Sea.
Suno kay Richard Perez, nataeupangdan it kaibahang mangingisda it anang igkampod nga si Romano Perez nga owa eon raya nakasakay sa anang baroto nga naga-eutaw-eutaw sa tunga it eawod.
Kaeabanan suno kana nga kon nagapangisda ro anang igkampod hay naga-uli raya pagka-aga.
Gindescribe kara ro anang igkampod nga moreno, maniwang, may kataason ro height, nakasuksok it kulay green nga long-sleeved t-shirt ag naka-pajama.
Kon sin-o suno kana ro nakasapupo ukon may gindagsa nga tawo sa andang lugar hay ipahisayod eon lang kanda, sa pinakamaeapit nga otoridad ukon iya sa Bombo Radyo Kalibo.
