KALIBO, Aklan—Nasapwan nga nagahamyangon ag uwa eon it kabuhi ro sangka mangingisda bandang alas-5:00 kaina it aga-aga sa Brgy. New Buswang, Kalibo.
Ginkilaea ro biktima nga si Danilo Lobas, 53-anyos, tubong probinsya it Cebu apang presenteng naga-istar sa nasambit nga lugar.
Suno sa anang amigo nga si Rogelio Jimenez, magkaibahan sanda kabie nga nag-inuman maghalin sa eawod kon sa siin bandang tungang gabi-e hay nag-una sigon imaw nga umuli.
Nagpabilin ro biktima kaibahan ro iba pa nandang kainuman sa nasambit nga lugar.
Ginapatihan nga posibleng nasantad si Lobas ag bangud sa kahilungon hay uwa eon raya nakabangon ukon nakatueogan eon lang imaw.
Ro lugar kon sa siin nakit-an ro anang patay nga eawas hay ginaabot it tubi eabi eon kon mataas ro taob ag posible suno kana nga naabot it tubi ro biktima ag naeomos bangud nga uwa eon raya nakabangon pa.
Ginpahayag dugang nga sangka maboot nga tawo si Lobas ag uwa raya it kontra sa andang lugar.
