KALIBO, Aklan–Owa eon it kabuhi kat masapwan ro sangka mangingisda matapos rayang makit-an nga naga-eutaw-eutaw sa tunga it eawod bandang 5:25 it hapon ku nagtaliwan nga adlaw it Lunes, April 25 sa baybayon it Buruanga partikular paagto it Caluya.
Pinaagi sa ginpatigayon nga search and retrieval operation it katapo it Maritime Police Office kaibahan ro MDRRMO-Malay ag Philippine Coast Guard Malay ukon PCG-Malay napatigayon nga narekober ro patay nga eawas ni Jose Ocson Flores, 57-anyos, residente it Brgy. Balusbos, Malay nga nauna eon nga ginreport sa Philippine Coast Guard Aklan nga naduea matapos nga mahueog sa ginasakyan nga baroto ku nagtaliwan nga gabi-e it April 18.
Ginpahayag ni PMAJ Leopoldo Booc Jr., Station Chief of Maritime Police Aklan nga matapos nga makit-an it mga mangingisda sa nasambit nga lugar ro eawas it biktima insigidang gin inporma ro anda nga taeatapan para respondehan.
Suno pa kay Booc, nga sa state of decomposition eon ukon gakatae-tae eon ro eawas it biktima bangud sa kabuhayon eon nga pagka-eumos.
Sa pihak nga parte, pagkatapos nga marekober ro eawas it biktima insigidas nga gin daea ro eawas kara sa Sambiray Port, Malay para mabirika it ana nga pamilya.
