LOCAL News — Kon pagapangutan-on ro sangka ordinaryong mangunguma sa probinsiya it Aklan, haeos pasang-awa ro gintau kara nga grado nga 70 to 80% kay Presidente Ferdinand Marcos Jr., angot sa anang mga inobrahan ag mga plano para sa Department of Agriculture sa ginpatigayon nga ika-tatlo nga State of the Nation Address ukon SONA.
Suno kay Rey Reyes, sangka mangunguma sa banwa it New Washington nga nagapati imaw nga gina-obra man it gobyerno ro tanan nga andang masarangan, apang bukon it bastante agud nga mapanaba ro presyo it mga baeak-eon eabi eon ro bugas tuga it importasyon ag mga polisiya it gobyerno.
Dapat suno kana nga suportahan ro kinahangeanon it mga mangunguma kapareho it mga binhi, abono, pestisidyo ag iba pa agud nga mapabaskog ro produksyon ag masiguro ro food security ag indi eon masyadong magsalig sa importasyon.
Kinahangean suno kana nga i-prayoridad nga mapanaba ro presyo it bugas apang nagapabilin raya nga mataas sa P55 hasta P60 kada kilo makaron, masyadong maeayo sa anang ginpromisa nga P20.
