KALIBO, Aklan—Nagapadayun ro imbestigasyon it pulisya sa natabu nga pagbaril-patay sa sangka mangunguma pasado alas-3:00 it Huwebes it aga-aga sa Brgy. Mabusao sa banwa it Ibajay.
Nakilaea ro biktima nga si Rodelio Hontillano, 62-anyos ag residente it nasambit nga lugar.
Suno kay P/Major Jerick Vargas, OIC chief of police it Ibajay Municipal Police Station nga base sa andang inisyal nga imbestigasyon samtang nga nagapahaum ro biktima nga magpananggot hay ginbinaril raya it owa pa nakilaea nga suspek samtang nagapaguwa sa andang baeay.
Nagpaeagiw ro gunman samtang nag angkon it ap-at nga tama it bala sa nagkaeain-eain nga parte it eawas ro biktima nga naging rason it anang pagkamatay.
Indi pa matumod ro baril nga gingamit it suspek bangud nga gina-usisa pa ro mga basiwo it bala nga narekober.
Ginasugid nga patay eon raya kat maka-abot sa Ibajay district hospital.
Gindugang pa ni Major Vargas nga ginatinguhaan nanda nga maka-usoy it mga testigo sa krimen agud nga matumod ro motibo ag mataw-an it hustisya ro pagkamatay it biktima.
Sa pihak kara, may natumod eon man sanda nga person of interest sa insidente.
